കോവിഡ് മഹാമാരിയുടെ പ്രതിസന്ധികള് മറികടന്ന് ജപ്പാനിലെ ടോക്കിയോയില് കായികലോകത്തെ മഹാമേളയായ ഒളിമ്പിക്സിന് തുടക്കമായി. 'മുന്നോട്ട്' എന്ന തീം ആധാരമാക്കി തുടങ്ങിയ ഉദ്ഘാടന ചടങ്ങുകള് ഏതു പ്രതിസന്ധിയും അതിജീവിച്ച് മനുഷ്യസമൂഹം മുന്നോട്ടു തന്നെ പോകുമെന്ന പ്രഖ്യാപനമായി മാറി.
കൊവിഡ് പ്രതിരോധത്തിന്റെ ഭാഗമായി ഒളിമ്പിക്സ് മത്സരവേദികളില് കാണികള്ക്ക് പ്രവേശനം അനുവദിക്കുന്നില്ലെങ്കിലും, നീണ്ട നാളുകള്ക്ക് ശേഷം കളിക്കളങ്ങള് ഉണരുന്നത് ഏറെ സന്തോഷം നല്കുന്ന കാര്യമാണ്. ഏതൊരു അത്ലറ്റിന്റെയും ഏറ്റവും വലിയ സ്വപ്നമാണ് ഒളിമ്പിക്സില് പങ്കെടുക്കുക എന്നത്. ഓഗസ്റ്റ് എട്ടിന് ഒളിംപിക്സിന്റെ സമാപനം കുറിക്കുമ്പോള് ലോകം പുതിയ ദൂരവും പുതിയ വേഗവും പുതിയ ഉയരവും കുറിച്ചിരിക്കും. അതിനപ്പുറം, ഒളിമ്പിക്സ് മാനവരാശിയുടെ കൂട്ടായ്മയുടെയും സാഹോദര്യത്തിന്റെയും സ്നേഹത്തിന്റെയും മഹത്തായ പ്രതീകമാണ്.
