തലസ്ഥാന നഗരിക്ക് പൂക്കാലമൊരുക്കി വസന്തോത്സവം ആരംഭിച്ചു.

തലസ്ഥാന നഗരിക്ക് പൂക്കാലമൊരുക്കി വസന്തോത്സവം ആരംഭിച്ചു. കേരള വിനോദ സഞ്ചാര വകുപ്പിന്റേയും തിരുവനന്തപുരം DTPC യുടെയും ആഭിമുഖ്യത്തില്‍ ലോക കേരള സഭയോട് അനുബന്ധിച്ച് സംഘടിപ്പിക്കുന്ന വസന്തോത്സവത്തിന്റെ ഉദ്ഘാടനം ബഹു: കേരള മുഖ്യമന്ത്രി പിണറായി വിജയന്‍ നിര്‍വഹിച്ചു. 2020 ജനുവരി 5 വരെയാണ് കനകക്കുന്നിലും സൂര്യകാന്തിയിലുമായി വസന്തോത്സവം നടക്കുന്നത്. രാവിലെ 10 മണി മുതല്‍ രാത്രി 8 മണി വരെയാണ് പ്രവേശനം.

കഴിഞ്ഞ വര്‍ഷത്തെ പോലെ ഇത്തവണയും പുഷ്പമേള കാര്‍ഷിക പ്രദര്‍ശന മേള, ഔഷധ-അപൂര്‍വ്വ സസ്യപ്രദര്‍ശനം, ഉത്പ്പന്ന വിപണന മേള, ഗോത്ര പാരമ്പര്യ പ്രകൃതി ചികിത്സാക്യാമ്പ്, ഗോത്ര ഭക്ഷ്യ മേള എന്നിവ മേളയുടെ ഭാഗമായി ഒരുക്കുന്നുണ്ട്.

പൂന്തോട്ടങ്ങളുടെ നഗരിയായ ബാംഗ്ലൂരില്‍ നിന്നും ഏതാണ്ട് 20,000-ഓളം ചെടികളാണ് ഇത്തവണ പ്രദര്‍ശനത്തിനായി എത്തുന്നത്. ഇത്തവണത്തെ ഏറ്റവും വലിയ ആകര്‍ഷണം ബാംഗ്ലൂരില്‍ നിന്നും ഉള്ള പുഷ്പാലങ്കാര വിദഗ്ധര്‍ ഒരുക്കുന്ന സബര്‍മതി ആശ്രമത്തിന്റെയും ജടായു പാര്‍ക്കിന്റെയും മാതൃകയിലുള്ള പുഷ്പാലംകൃത രൂപങ്ങളായിരിക്കും. 

ടൂറിസം വകുപ്പിനെ കൂടാതെ വനം വകുപ്പ്, കൃഷി വകുപ്പ് തുടങ്ങി മറ്റു വകുപ്പുകളും ഏജന്‍സികളും സ്വകാര്യ സ്ഥാപനങ്ങളും പ്രദര്‍ശന സ്റ്റാളുകളുമായി വസന്തോത്സവത്തില്‍ പങ്ക് ചേരുന്നുണ്ട്.